13 октября, 2021 - 11:37
Социальный сферада ишлеген адамла жандауурлукъ, жюрек халаллыкъ, жюрек жылыу, адамгъа болушургъа итиниулюклери бла да эсленип къаладыла. Социальный ишчилени ол багъалы тюрсюнлери ючюн ала къарагъан къарт, жангъыз, къарыусуз адамла бек сюедиле. Аны ючюн болур араларында терен ангылаулукъ.
Черек муниципал районну къартлагъа къарагъан арасында ишлерин уста билген, бек сюйген адамла ишлейдиле. Хар бири кесини жеринде къарт адамланы келлерине жетер ючюн, къарыуларын, заманларын да аямай, кюрешедиле. Араны таматасы Улбашланы Алина хар не жаны бла да болумну тап этер мадарланы хайырланады.
Социальный ишчилени алып айтханда уа, къарталагъа эс тапдырыугъа аладан бирчиги да уллу келлю болмайдыла. Мында Атабийланы Нина оналты жыл ишлейди. Ол Огъары Малкъарда жашайды, мында къартлагъа къарайды. Хар кюн сайын юйлерине барып, саулукъ-эсенлик соруп, не жаны бла да жумушларын этеди. Ма аны ючюн къартла бу жаш адамгъа бек ыразыдыла.
- Дарман керек болса да, ары-бери барыргъа тюшсе да, юйде жумушха къараргъа Атабийланы Нина бек сакъды, аузубуздан чыкъгъынчы жумушубузну тамалайды. Бирде уа бизни жюрегибизни къууандырыр ючюн, саугъала да этеди, алай бек уллу саугъа уа – аны бизге жюрек жылыу бергениди, - деп Нинагъа ыразылыкъларын билдиредиле абаданла.
Къартлагъа ариу кезден къарау, жан аурута билиу - Атабийланы Нинаны энчи адамлыкъ шартыды.