22 февраля, 2023 - 15:32
Жашауну къайсы бёлюмюнде да бардыла устала. Ала жашау жолларына бир усталыкъны сайлап, аны бардырып тебиреселе, аны чегине да жетдиредиле, чынтты устасы да боладыла. Аллай адамладан бириди бюгюнлюкде Къашхатауда жашагъан къобузчу къыз Деунежева, Созайланы Мадина. Къобузну жырлата, жилята да билген уста.
Бир жол белгили къарачайлы назмучу бла жырчы Тамбийланы Къасбот келген эди къонакъгъа. Аны бла Къашхатаугъа, Бабугентге да барабыз. Мадина бла да анда шагъырей болгъан эдим. Къасбот къыл къобузну согъуп, жырлап тебиресе, ол а олсагъат аны макъамын къобузгъа сала эди. Андан сора Черек районда бардырылгъан байрамлада кёре турдум.
Мадина Нальчикде туугъанды, школну уа Хасанияда бошагъанды. Анда окъугъан кезиуюнде, ары Мухамед Аджиевич Маметов келген эди, сабийлени къобуз согъаргъа юйретирге музыка школгъа чакъыра. Анасы Зарият къызын ары элтеди. Беш жылны ичинде дерследен сора Мадинаны ары жюрютеди. Анда Кожева Мадина Анзоровна, Валерий Николаевич Харитонов юйретедиле къызны къобуз согъаргъа. Мадина бюгюн да хурмет бла эсгереди аланы атларын.
- Ала мени къуру къобуз согъаргъа юйретгенлери бла къалмай, макъамлагъа сюймеклик салгъандыла, - дейди аланы эсгере къобузчу къыз.
Элде школну бошагъандан сора музыка училищени къобуз согъаргъа юйретген бёлюмюне киреди. Мадина окъугъан да эте, белгили балетмейстер Къудайланы Мухтар бла «Асса», «Элия» тепсеу къауумлада ишлегенди. Андан сора да Текуланы Махмут бла филармонияда. Белгили адамла бла ишлегени жаш къобузчугъа сынау алыргъа уллу себеплик этгенди.
Окъууну бошагъандан сора институтха киреди. Ол кезиуде эрге чыгъып, Къашхатаугъа кёчеди. Андан бери анда жашайды, эки жаш, эки къыз ёсдюреди. Аны бла бирге ишин да бардырады: Маданият юйде «Аламат», «Къууанч» тепсеу къауумлада къобуз согъады.
Андан сора да, Мадина элде сабий садда да ишлейди. Юйретген сабийлери бла тюрлю-тюрлю фестивальлагъа къатышады: Къарачайда бардырылгъан «Айранны байрамына», мында кесибизде ётген «Нарт оюнлагъа», «Алтын къолгъа».
Усталыгъыны юсюнден айтханда, ол къобуз согъууну эм башына чыкъгъанма, энди манга жетеди деп, аны бла чекленип къалмагъанды. Жангы тартыула согъаргъа юйренеди. Жырланы, макъамланы ноталагъа да салады. Сёз ючюн, Тюменланы Айшатны жырларын, Чеченланы Асяны къобуз тартыуларын. Бу кюнледе уа «Малкъар вальс» жыргъа макъам сала турады. Аны да жууукъ заманда эшитирбиз деп ышанабыз.
